22 de abril, Día da Terra

Pódese vivir unha longa vida sen aprender nada.

Pódese durar sobre a terra sen agregar nin cambiar unha pincelada de paisaxe. Pódese simplemente non estar morto sen estar tampouco vivo.
Basta con non amar, nunca, a nada, a ninguén.
É a única receita infalible para non sufrir.
Pero un día descubrín que aínda podía facer algo
para estar completamente viva antes de estar definitivamente morta.
Entón, púxenme en movemento.

----Hoxe celébrase en todo o mundo o Día da Terra. Desde 1970 estableceuse o 22 de abril co obxectivo de crear unha conciencia común fronte aos problemas de contaminación, a conservación da biodiversidade e demais temas relacionados coa protección do medio ambiente.

----Dous anos máis tarde celebrouse a Primeira Conferencia Internacional sobre o Medio Ambiente. Aproveitáronse tamén as celebracións para o lanzamento da película de Disney, 'Océanos', un documental sobre a vida nas profundidades do planeta.

----En tanto, a NASA (a Axencia Espacial Norteamericana) tamén presentou un especial fotográfico, ao cal é posible acceder facendo clic aquí.

----E nós... Que facemos hoxe pola Terra? A quen imos culpar despois? Onde imos ir cando non haxa onde ir?

----Imos, érguete, fai algo máis que ollar, aceptar e resignarte. O tempo de durmir pasou.

III Concurso de fotografía Leite Celta

Voz Natura e Leite Celta convocan a terceira edición do seu concurso de fotografía ambiental co obxectivo de pór en valor o importante patrimonio natural de Galicia.
Os traballos que se presenten deben recoller os diversos ecosistemas presentes en Galicia desde un punto de vista creativo, orixinal e interesante. Estes serán precisamente os factores que o xurado do certame terá en conta á hora de fallar os premios.

O concurso estrutúrase en dúas modalidades:
-Infantil: para nenos ata 12 anos.
-Xuvenil: de 13 a 18 anos.

O sistema de participación é moi sinxelo: unha vez realizada a fotografía, a imaxe insérese directamente na maqueta oficial do concurso, cóbrense os campos solicitados e envíase ao correo electrónico do programa (voznatura@lavoz.es). Se non se ten cámara dixital, tamén se pode imprimir a maqueta, pegar a imaxe no lugar reservado para iso e enviala por correo postal a Voz Natura. O prazo de presentación de traballos finaliza o próximo 15 de abril.

En cada categoría entregaranse tres premios:
-1º premio: cámara de fotos dixital de 12 mega píxeles (con zoom óptico, trípode e funda)
-2º premio: consola sobremesa Wii de Nintendo.
-3º premio: bicicleta de montaña de alumnio lixeiro de 24 velocidades e casco de seguridade.

Os gañadores recibirán os seus galardóns no transcurso da festa fin de curso de Voz Natura, que se celebrará o próximo mes de xuño, no parque de Acea de Ama (Culleredo- A Coruña).

Consulta as bases do certame, descarga a maqueta oficial e descobre as fotografías gañadoras o curso pasado AQUÍ

5 de xuño, Día do Medio Ambiente

Nun recente informe acerca do compromiso dos españois co medio ambiente saliéntase que a maioría da poboación mantén unha actitude positiva cara á conservación do medio natural, mais so un de cada dez ten un comportamento axeitado. Incluso a maioría practica hábitos agresivos co medio ambiente. Unha porcentaxe moi elevada afirma estar pouco ou nada informada acerca dos problemas medioambientais (contaminación, cambio climático, aumento dos residuos urbanos e os seus tratamentos, perda da biodiversidade, desertificación, diminución dos recursos hídricos, pesqueiros, minerais, enerxéticos…).
Aínda que os españois recoñecen a necesidade de actuacións protectoras, non están dispostos a renunciar a acadar maiores niveis de consumo e ademais centran as responsabilidades nos poderes públicos.
Polo que se refire a Galicia, esta Comunidade necesitaría seis veces o seu territorio para soportar a "pegada ecolóxica" que na actualidade orixina, entendendo por "pegada ecolóxica" a área do territorio produtivo ou ecosistema acuático necesaria para producir os recursos utilizados e para asimilar os residuos e a contaminación dunha poboación. Este termo débese comparar co de "capacidade de carga", que se define como a capacidade que presenta un ecosistema para sustentar e, ao mesmo tempo, manter a produtividade e a renovabilidade dos recursos.
A relación entre os dous termos revela que Galicia presenta un déficit ecolóxico elevado, o que significa que necesitamos máis terreo do que temos. Dispoñemos de, aproximadamente, 3 millóns de hectáreas de terreo e demandamos máis de 17 hectáreas para satisfacer as nosas necesidades. Estes datos fannos recapacitar e recoñecer a importancia de buscar alternativas ao consumo irracional e desproporcionado que temos, a informarnos acerca dos problemas ambientais e a seguir hábitos de vida máis respectuosos co medio a fin de conquerir un desenvolvemento sustentable, para nós e para as xeracións futuras.

Pensa cal será o teu graniño de area que faga a montaña e... ACTÚA!

Para obter máis información e recursos podes premer AQUÍ

Carmen Tizón