o sorriso da muralla

Adeus co corazón...

2011-07-04T19:32:00.002+02:00

Ímonos con sabor agridoce. Despois de máis de dous anos traballando no blog e na biblioteca, con inconmensurables doses de ilusión, chegamos a un punto no que hai unha barreira que non podemos superar.

Agradecemos moitísimo a colaboración das persoas que creron, como nós, no proxecto, e especialmente amosamos o noso agradecemento aos alumnos que participaron con entusiasmo nas actividades, nos clubs de lectura... ou simplemente devolvendo o sorriso cando se achegaban á biblioteca.
Por todas estas persoas e a satisfacción recibida, tamén polo motivador e inesquecible traballo en equipo que levamos a cabo, son as bágoas que enturbian o noso sorriso, o sorriso da muralla.

Quen sabe se quizáis algún día poderá volver a lucir...

Agora non podemos máis que, poñendo a man no corazón e levando os dedos aos beizos, dedicarvos un último sorriso.

Grazas, felices vacacións e felices lecturas a todos. Ata sempre.

De Bibliolhosgrandes, Sunshine Award. Grazas

2011-06-30T23:58:00.001+02:00

A biblioteca dos Ollos Grandes outórganos o premio Sunshine Award, agradecemos a distinción, especialmente a María, da que admiramos hai tempo o seu gran traballo.

É obriga partillar o premio con outros doce blogs, avisar aos seleccionados e publicar o enderezo do seu blog, nós destacamos en especial os seguintes:

A vacaloura

As zocas faladoras

Biblioleiras

Biblioteca "Poeta Díaz Castro"

Biblioteca do CMUS de Lugo

Biblioteca Pública Nodal de Lugo

English is all around

FESTIVAL FIN DE CURSO 2011

2011-06-26T22:38:00.001+02:00

O venres pola mañá tivo lugar o festival de fin de curso: interpretacións musicais, coreografías, deporte e entrega de premios de diversas actividades. Como sorpresa final visitounos Brancaneves, quen nos contou algunhas cousas da súa vida que non aparecen nos libros que temos na biblioteca.

Moitísimas grazas e parabéns para tod@s.

O día "E"

2011-06-20T22:06:00.021+02:00

----O 18 de xuño de 2011 o Instituto Cervantes celebrou o Día do Español cunha choiva de palabras mundial.

----Lanzou un concurso para elixir a palabra máis fermosa do idioma español. E a gañadora foi… “Querétaro”.

----A palabra, proposta polo actor mexicano Gael García Bernal, recibiu 5.849 votos na web de entre as 33.000 votacións que se recibiron no Instituto Cervantes. Seguíronlle “Gracias”, proposta polo cantante Raphael; “Sueño”, do profesor español Luis Rojas Marcos; “Libertad”, proposta polo escritor peruano Mario Vargas Llosa; e “Jesús”, do cantautor dominicano Juan Luis Guerra.

“Compartir unha lingua que irmanda a 500 millóns de persoas é un fermoso motivo para festexar xuntos”, manifestou a directora do Instituto Cervantes, Carmen Caffarel,

ao inaugurar a xornada na sede central de Madrid. Os actos realizados nas sedes de todo o mundo quedaron inaugurados cunha solta de globos que levaban escritas palabras como “bullicio” ou “albricias”.

----Querétaro é o nome dun estado mexicano, e aínda que non figura no dicionario da RAE, levouse a honra de ser a palabra máis fermosa do idioma español.

E a túa… cal é?

----

Jorge Luis Borges

2011-06-16T07:41:00.074+02:00

A quen ler

----Se as páxinas deste libro consenten algún verso feliz, perdóeme

o lector a descortesía de habelo usurpado eu, previamente. As nosas nadas pouco difiren, -é trivial e fortuíta a circunstancia -de que sexas ti
o lector destes exercicios, e eu o seu redactor.

---------------------------------------------------J.L.B.

----Este martes conmemorouse o 25º aniversario da morte do escritor arxentino Jorge Luis Borges, un dos máis coñecidos autores da literatura do século XX. Amante da filosofía, a teoloxía, a matemática ou a mitoloxía, da súa pluma saíu unha inxente produción literaria composta por contos, poemas e ensaios.

----Do seu poemario "O outro, o mesmo" escollo a deliciosa peza 'Outro poema dos dons' e propóñovos
a súa lectura. É un poco longo (só a efectos de espazo no blog, que non porque canse a súa beleza).
----Déixovos co seu comezo e os últimos versos:

Grazas quero dar ao divino Labirinto dos efectos e das causas
Pola diversidade das criaturas que forman este singular universo.
Pola razón, que non cesará de soñar cun plano do labirinto,
(...)
Pola linguaxe, que pode simular a sabedoría,
Polo esquecemento, que anula ou modifica o pasado.
Polo costume, que nos repite e confírmanos como un espello,
Pola mañá, que nos depara a ilusión dun principio,
Pola noite, a súa tebra e a súa astronomía,
Polo valor e a felicidade dos outros,
Pola patria, sentida nos xasmíns, ou nunha vella espada,
Por Whitman e Francisco de Asís, que xa escribiron o poema,
Polo feito de que o poema é inesgotable
E confúndese coa suma das criaturas
E non chegará xamais ao último verso
E varía segundo os homes,
Por Frances Haslam, que
pediu perdón aos seus fillos por morrer tan amodo,
Polos minutos que preceden ao soño,
Polo soño e a morte, eses dous tesouros ocultos,
Polos íntimos dons que non enumero,
Pola música, misteriosa forma do tempo.

...non se pode expresar máis dun xeito tan sinxelo.

(Podes ler aquí o poema completo)

Día mundial do doante de sangue

2011-06-14T19:43:00.000+02:00

Lecturas para o verán

2011-06-13T09:30:00.003+02:00

Chegando xa ao remate deste curso, queremos propor algunhas lecturas para o verán entre os últimos libros recibidos... pero non son os únicos! Hai moitas máis novidades na biblioteca, e moitas delas son propostas vosas, así que seguro que vos gustan.

Máis nenos estudando, menos nenos traballando

2011-06-12T18:10:00.000+02:00

En todo o mundo, e en franca violación dos dereitos da infancia, centos de miles de nenas e nenos fan traballos que os privan da educación, da saúde, do tempo de lecer e das liberdades elementais. Destes nenos, máis da metade sofren as peores formas de traballo infantil, como o traballo feito en lugares perigosos.

A Organización Internacional do Traballo (OIT) estableceu o primero Día mundial contra o traballo infantil no ano 2002 como forma de poñer de relevo a gravísima situación destes nenos. Este día celébrase o 12 de xuño e ten como obxectivo exercer de catalizador do crecente movemento mundial contra o traballo infantil.

Para que serven os libros?

2011-06-11T08:33:00.024+02:00

Para isto serven...

...elixide vós o formato

----E despois de mostrar a función dos libros, cómpre dicir algo sobre a función do lector... e nada mellor nin máis ilustrativo que un conto de Eduardo Galeano, titulado exactamente así.

A función do lector

----Cando Lucía Peláez era moi nena, leu unha novela ás agachadas. Leuna a cachiños, noite tras noite, agochándoa baixo a almofada. Ela roubouna na biblioteca de cedro onde o tío gardaba os seus libros preferidos.

----Moito camiñou Lucía, despois, mentres pasaban os anos. Na busca de pantasmas camiñou polos farallóns sobre o río Antioquía, e na busca de xente camiñou polas rúas das cidades violentas.

----Moito camiñou Lucía, e ao longo da súa viaxe ía sempre acompañada polos ecos dos ecos daquelas afastadas voces que ela escoitara, cos seus ollos, na infancia.
----Lucía non volveu ler ese libro. Xa non o recoñecería. Tanto lle creceu adentro que agora é outro. Agora é seu.

----

Despedida de Estantigas Veteranas

2011-06-09T20:31:00.001+02:00

As Estantigas Veteranas pecharon este ano a súa actividade o luns pasado. O señor Ibrahim e o seu amigo Momo compartiron con nós uns doces á hora do recreo. Temos unha nova cita o día 22 pola tarde para achegarnos á visión cinematográfica da novela.

Fin de curso, fin da actividade lectora no club (seguiremos lendo durante o verán). Graciñas a tod@s e unha forte aperta. Ata o vindeiro curso.

Entre hortas e portas

2011-06-07T16:42:00.001+02:00

O profesor do noso centro Xosé Manuel González Pérez presentou o venres pasado o seu libro "Entre hortas e portas", no que lembra como era a cidade de Lugo no espazo de tempo que vai desde os anos 60 ata os 80.

O autor lembra o Lugo dos barrios, el vivía no de San Roque, que está como di o título entre as hortas que había nos espazos sen urbanizar e as portas da muralla. No libro aparecen persoeiros e lugares da cidade que dalgunha maneira foron importantes na vida do escritor.

GAÑADORES DOS CONCURSOS DAS ADIVIÑAS 2011

2011-06-07T10:12:00.002+02:00

Este ano o escrutinio estivo moi disputado. É un pracer comprobar o ben que adiviñades. Parabéns para todos.

O gañador de "Adiviña, adiviña" é:

-Manuel Fernández Veiga de 1º de E.S.O.-A

As gañadoras de "Adiviña quen son" son:

-Beatriz Álvarez Díaz de 4º de E.S.O.-A

-Marta Salgado Castelo de 1º de BACH.-B

Moitísimas grazas a todos pola vosa participación.

Os premios entregaranse proximamente.

5 DE XUÑO, DÍA MUNDIAL DO MEDIO AMBIENTE

2011-06-05T13:12:00.003+02:00

O 5 de xuño celébrase o Día Mundial do Medio Ambiente. O lema deste ano é: Bosques: a natureza ao seu servizo.

Os bosques cubren a terceira parte da superficie do noso planeta, é o ecosistema máis diverso bioloxicamente sobre a terra, son o fogar para máis da metade das especies terrestres e a cuarta parte da poboación mundial depende dos seus recursos.

A deforestación continuada, cada día pérdese unha superficie equivalente a 14.000 hectáreas, ten consecuencias devastadoras para o equilibrio do planeta. Co lema deste ano preténdese impulsar a conservación forestal e o desenvolvemento sostible. A conservación dos bosques ten que estar na conciencia persoal e colectiva para cambiar o noso estilo de vida.

Al olmo viejo, hendido por el rayo

y en su mitad podrido,

con las lluvias de abril y el sol de mayo

algunas hojas verdes le han salido.

¡El olmo centenario en la colina

que lame el Duero! Un musgo amarillento

le mancha la corteza blanquecina

al tronco carcomido y polvoriento.

No será, cual los álamos cantores

que guardan el camino y la ribera,

habitado de pardos ruiseñores.

Ejército de hormigas en hilera

va trepando por él, y en sus entrañas

urden sus telas grises las arañas.

Antes que te derribe, olmo del Duero,

con su hacha el leñador, y el carpintero

te convierta en melena de campana,

lanza de carro o yugo de carreta;

antes que rojo en el hogar, mañana,

ardas en alguna mísera caseta,

al borde de un camino;

antes que te descuaje un torbellino

y tronche el soplo de las sierras blancas;

antes que el río hasta la mar te empuje

por valles y barrancas,

olmo, quiero anotar en mi cartera

la gracia de tu rama verdecida.

Mi corazón espera

también, hacia la luz y hacia la vida,

otro milagro de la primavera.

Antonio Machado (1875-1939)

Leonard CohenPríncipe de Asturias das Letras

2011-06-02T06:11:00.020+02:00

----Agora podía cantar, e cantou. Dixo as cousas que di quen viviu e pregúntase canto e para que; quen amou e pregúntase a quen e por que, e, tendo feito as preguntas todas atópase sen resposta, unha soa que fose. É o contrario daquel que afirmou un día que as respostas están todas por aí e que nós non temos máis que aprender a facer as preguntas.

----Con esa voz grave, que parece xurdir do fondo
dunha caverna, a sensibilidade foi sempre o motor da súa obra, e o trazo fascinante do seu cancioneiro. Como un cabaleiro da triste figura, co seu chapeu e a súa fraqueza estilística, Cohen achegou “sex-appeal” á nobre arte de compor cancións e cantalas. Desde os seus comezos mostrou un asombroso talento e arroxo para cruzar música e literatura, unha envexable capacidade para crear poemas musicados ou cancións con certeza poética.

----Os seus seguidores acoden a el para curar as feridas ou ter un fogar entre as ruínas da vida. Como o fareiro na noite escura, Cohen, íntimo e humano, alumea o camiño para os sinuosos trazos sentimentais da alma.

----Os premios Príncipe de Asturias volven recoñecer o valor da composición musical. Alí onde non soa a música monótona do anticantante Leonard Cohen. Alí onde as súas letras son literatura. Antes foi Dylan. Hoxe é Cohen. Gaña a música. Gañamos todos. Parabéns ao gardián Cohen.

----Suzanne, de 1968, é o éxito indiscutible de Cohen e a primeira canción do seu primeiro álbum “Songs of Leonard Cohen”. Enchida de profundidade literaria, con ela Cohen chegaba á música tras publicar novela e poesía. Suzanne vive xunto ao río...

Hoxe non é o día da lingua

2011-06-01T00:04:00.000+02:00

Que o sexa depende de min e de ti

31 de maio, Día Mundial Sen Tabaco

2011-05-31T00:49:00.001+02:00

Sorteo de comics

2011-05-30T20:41:00.005+02:00

O xoves pasado tivo lugar na biblioteca a entrega dos comics que se sortearon entre todos os alumnos que fixeron o boletín que acompañaba a exposición celebrada nos meses de marzo e abril. A gañadora foi Beatriz Álvarez Díaz de 4ºA.

Agradecemos a todos a súa participación e as suxestións para a compra de comics. Estes días están chegando á biblioteca as novas adquisicións que xa podedes ir solicitando en préstamo.

Olimpíada matemática

2011-05-25T12:48:00.001+02:00

Parabéns para Juan Manuel Cano Vila de 2º de E.S.O. que ven de clasificarse para a final nacional da Olimpíada matemática que se celebrará en Vigo do 26 ao 30 de xuño.

Ánimo Juan, e non esquezas que o importante é disfrutar coa experiencia de xogar, pensar e ler coas matemáticas.

Despedida de Estantigas1

2011-05-23T20:40:00.004+02:00

O pasado venres despedimos o club de lectura Estantigas1 entre risas, contos de medo e chuches. Era unha experiencia nova para todas, alumnas e profe. Xunto coas fotos está a valoración das participantes, so queda dicir que para mín foi unha actividade inolvidable que vos debo a todas. Moitísimas grazas, foi un verdadeiro pracer coñecervos lendo.

Internet e vós

2011-05-21T20:20:00.084+02:00

----O 17 de maio foi o día da Internet. Quedou un pouco tapado porque, como sabedes, coincidiu co día das Letras Galegas, o que acaparou toda
a nosa atención.
----Agora permítome volver uns días atrás para reflexionar sobre o uso que da tripla W facemos.

----Tendo en conta que esta VII Edición do Día da Internet pon o seu foco principal no debate sobre como Internet e as
Novas Tecnoloxías afectan aos Dereitos Humanos,
non se me ocorre mellor idea que aproveitalo hoxe aquí para
achegarvos ao concepto da seguridade na Rede. ----------------------------(pica para ver o vídeo)

Baixo o lema "de aquí non pasas",
a asociación Save The Children fixo unha campaña para alertar aos rapaces sobre os riscos asociados ás Redes Sociais e nós queremos, nun esforzo común, achegárvola a vós. Non se trata de restrinxir o uso da internet, senón de educar sobre el.

Porque non che coñezo de nada, porque non nacín onte,

porque as túas historias non me impresionan...

porque sei como coidarme na Rede

------de aquí

------------non pasas.

Máis información aquí e- aquí-----

E se tés alma de escritor ou escritora?

2011-05-19T12:00:00.001+02:00

Para calquera idade...

Bases Relatos Cortos dos Lectores 2011

TORNEO ENTRE INSTITUTOS DA CIDADE 2011

2011-05-18T20:43:00.002+02:00

O Torneo entre institutos da cidade de Lugo 2011 desenvolverase ao longo do sábado 28 de maio e a mañá do domingo 29 de maio do 2011.

Estableceranse catro modalidades deportivas: fútbol sala, baloncesto, balonmán e voleibol. Dentro de cada unha destas disciplinas deportivas establecerase unha única categoría.

Cada equipo de fútbol sala e baloncesto ten que estar formado coma mínimo por 5 persoas e como máximo por sete persoas. No caso de balonmán estarán formados como mínimo por 7 persoas e coma máximo por 9 compoñentes, e os equipos de voleibol como mínimo por 6 persoas e coma máximo por 8 compoñentes. En casos especiais, a Concellería de Xuventude e os Radares estudarán a posibilidade de que os equipos sexan formados por máis ou menos persoas. Os equipos poderán ser masculinos, femininos ou mixtos, participando todos na mesma categoría.

As inscricións presentaranse no local dos Radares Xuvenís de cada centro educativo. O prazo de inscrición dos equipos será dende o día do seu anuncio ao 25 de maio de 2011 ás 19:00 horas.

O día 27 de maio de 2011 expoñerase no taboleiro informativo de cada un dos centros educativos a data, horario e lugar dos partidos.

E tranquilos...que haberá PREMIOS!

PARA CONSULTAR AS BASES, AUTORIZACIÓNS E FOLLAS DE INSCRIPCIÓN FALA CO RADAR DO TEU CENTRO.

Camiño de Santiago 2011

2011-05-18T15:12:00.003+02:00

Hai uns meses, acordamos co noso profesor de Tecnoloxía, Gerardo, facer o Camiño a Santiago de Compostela. Todo o mundo nos dicía que estabamos tolos, que como se nos ocorría facelo en dous días e cunha kilometraxe tan elevada.

Pero chegou o día, eran as nove menos cuarto da mañá dun día anubrado (14 de maio de 2011). Quedamos os camiñantes, na fachada norte da catedral, selamos a credencial e puxémonos a camiñar, non podiamos parar, o noso obxectivo atopábase a un kilómetro de Arzúa (Ribadiso), e tiñamos que chegar fose como fose. Fixemos unha parada a media mañá para comprar o avituallamento (aprox. 30 minutos), seguimos camiñando e camiñando ata que ás dúas e cuarto paramos para comer (aprox. unha hora). Continuamos camiñando ata que despois de outra parada máis chegamos a Melide (57 km en escasas oito horas). Pero chegados ata aí, non podiamos parar (ese fora o reto da outra vez), tiñamos que chegar 5 quilómetros máis alá. Chegar, chegamo,s aínda que non todos.

O 15 de Maio era o día previsto para chegar a Santiago de Compostela. Despois dunha noite axitada no albergue, estabamos preparados para iniciar a nosa camiñata cara Santiago. Eran as 8:45 e estabamos dispostos a subir todas aquelas impoñentes costas para chegar a Santiago. As nosas únicas paradas foron para comer, en Arca e no Monte do Gozo para asearnos un pouco.
O noso reto foi conseguido con creces por practicamente "todos", chegando a Santiago ás 19:15.

AVENTUREIR@S:

- Gerardo Baamonde.
- Lenin Espín.
- David Graña.
- Diego Graña.
- Marco Gugliandolo.
- Jonathan Lópes.
- Marta Salgado.

KILOMETRAXE:
- Primeiro día, 14 de maio, LUGO - ARZÚA (aproximadamente 60 km).
- Segundo día, 15 de maio, ARZÚA - SANTIAGO DE COMPOSTELA (aproximadamente 45 km).

Entrega de premios do III Concurso literario en inglés

2011-05-18T08:45:00.008+02:00

Os premiados xunto co xurado

O martes día dez, tivo lugar na biblioteca a entrega de premios do III Concurso literario convocado polo departamento de inglés. Os premiados foron: María Losada Burgo e Claudia García González de 3º de E.S.O., Beatriz Álvarez Díaz de 4º de E.S.O. e José Manuel Núñez Vázquez de 1º de Bacharelato.

Parabéns para os premiados e tamén para todos os participantes e o xurado.

CLUB DE LECTURA ESTANTIGAS1

2011-05-18T08:39:00.002+02:00

O venres 20, á hora do recreo, vémonos na biblioteca. Comentaremos os dous últimos contos do libro que estamos a ler. Rematamos o club de lectura por este ano. Non faltedes á celebración.

17 de maio, día das Letras Galegas

2011-05-17T12:58:00.050+02:00

---"Que a vida non me sorprenda xamais
desprevenido, calado e neutral
e que un segundo antes de renderme
vaia tamén comigo a imaxe do que fun
--------------------------------------- cando era outro.”

Lois Pereiro, do poema Alerta e vixiante

Manuel Rivas dixo que cada un dos poemas
de Lois Pereiro "era como compoñer un espello,
abrirse paso no azougue, cada poema del
era unha fiestra, un escaparate, unha luminaria
que nos abría outra visión da realidade".

Dixo tamén que "a poesía é a voz da cuarta persoa
do singular. A ponte entre o singular e o plural,
sen deixar de ser singular. Así era Lois
como persoa, e así era a súa poesía. Por iso soa
tan diferente e tan próxima a un tempo,
tan estraña e tan familiar,
tan solitaria e tan solidaria".

Un inédito de Lois Pereiro

2011-05-16T08:41:00.068+02:00

----Pois si, a editorial Edicións Positivas
atopou este texto de Lois Pereiro, que fixo para eles
coa intención de publicar na lapela do seu primeiro libro, pero como o libro non tiña lapela daquela quedou fóra.
-----Despois de moitos anos a editorial atopouno,
non sen grande esforzo e unha chisca de sorte.

----Excelente cómo Lois define a Lois.
Velaí vai:

POR UNHA FICHA POLICIAL DO PENSAMENTO

----Lois Pereiro, DNI 14248884, nado en Monforte de Lemos o 16 de febreiro de 1958 - Trinta e tres anos. Fillo de Manuel Rodrigo e Inés. Cabelos castaños-roxizos e algúns brancos. Ollos verdes ou grises, segunda a luz.
----Extrema delgadeza, pómulos pronunciados, rostro longo e estreito. Nariz longo e lavres finos. Ollada inquedante e sombría.
----Potencialmente perigoso, quizais só para si mesmo, e por ese motivo, tamén para o sistema. De tendencias libertarias, pero sen ideoloxía concreta ou definida. Polo de agora a súa obra é case exclusivamente poética, publicada en antoloxías ou revistas e distintas publicacións.
----Os libros “De amor e desamor” I e II, unha antoloxía poética de ámbito estatal: “Después de la modernidad. Poetas españoles en sus lenguas territoriales”, de Julia Barella, e outros libros antolóxicos ou conmemorativos coma o de poemas premiados en tódalas edicións do Concurso de Poesía “O Facho”, etc…
----A súa poesía manifesta a presencia do alento atlántico, pero sen alonxarse da Galicia interior, dentro da fonda tradición palpable nos bosques do Incio, de onde procede a súa familia, e forma parte da “patria da súa infancia”.
----Recolle as influencias asumidas e mitificadas de autores como Ezra Pound, Yeats ou Dylan Thomas.
----Lois Pereiro define a súa loita co proceso de creación como “unha caída de si mesmo, un internamente no abismo, para logo reconstruírse, unha aprendizaxe en loita contra o insomnio”.
----“A poesía”, dicía Conrad, “é coñecer o Ser no fracaso”.
_______________________

----O libro que ía levar esta fermosa
autopresentación é "Poemas 1981/1991" e comeza así:
-------Deixa un bico no espello
-------onde arde a miña sombra pola noite...

Celebracións matemáticas

2011-05-13T23:42:00.000+02:00

Participantes en "Matemáticas na rúa"

Dentro das celebracións con motivo do Dia escolar das matemáticas os alumnos de 1º e 4º de E.S.O. participarón na actividade organizada polo Concello "Matemáticas na rúa" que tivo lugar o martes día 10. Por outra banda todos os alumnos do noso instituto seguen a resolver as adiviñas dos concursos organizados pola biblioteca e o departamento de matemáticas. Felicitamos a todos polo ánimo e entusiasmo que poñen.

Este ano a Federación Española de Sociedades de Profesores de Matemáticas proponnos a conferencia ¿É posible a química sen matemáticas? impartida polo catedrático emérito do Departamento de Enxeñería Química da Universidade de Barcelona. Se queres escoitala preme aquí.

Programa do Festival das Letras Galegas 2011!

2011-05-11T21:41:00.005+02:00

O venres, día 13 de maio, a partir das 12:50 celebramos no noso instituto o Festival da Letras Galegas 2011:

Presentado por Marta Bohorque (2º ESO B), Christian Toimil (1º BAC A) e Alba Mª Pereira (2º ESO A):

REPRESENTACIÓN TEATRAL

OBRA: “Os vellos non deben de namorarse” (Castelao)

Representación do 1º lance a cargo de:
.-Víctor Rodríguez Ferreiro (1ºBAC B).
.-Ángela Beltrán Álvarez (1ºBAC B).
.-Alba Pereira Pontide (2ºESO A).
.-Yessica Fernández Ramos (2ºESO B).

Colabora o profesor de Lingua Galega e Literatura Xosé Manuel González, representando ao autor Daniel Rodríguez Castelao.

INTERPRETACIÓN MUSICAL a cargo do alumnado do centro.

VIDEO: "A ESCOLA DAS AREAS" de LUA Films, coproducido con TVG e patrocinado pola Xunta de Galicia.

INTERPRETACIÓN MUSICAL a cargo do alumnado do centro.

RECITAL DE POESÍA E MÚSICA en honra á figura de Lois Pereiro.

ACTUACIÓN MUSICAL a cargo do violinista Daniel Rodríguez Castiñeira.

ENTREGA DE DEPLOMAS para os premiados no Certame Literario do Día das Letras Galegas.

30 anos da morte de Bob Marley (permitídeme este inciso "musical")

2011-05-11T18:00:00.042+02:00

Domingo; sol e sombras, luz e noite,
guerra e paz, fame e fartura, felicidade e tristeza, risa e choro, esperanza e abismo.
É a vida, que non se sortea igual para todos.

Bob Marley escribiu unha vez: “ninguén se fixa na cor dos ollos para levantar unha barreira”.

------Pero sucede coa pel, a roupa,- os- idiomas- e- os -deuses.- Murallas- de- medo, de cultura. Son tempos de cambio e revolución. De catarse... todo o inamovible, móvese.

------Marabillosa interpretación coral deste One Love de Marley. Música sen fronteiras, sen imposturas, sen o negocio da diferenza.

O texto pertence a Ramón Lobo, e aparece no seu blog de El País (Aguas Internacionales)

LETRAS GALEGAS 2011

2011-05-10T08:11:00.003+02:00

Este ano o Día das Letras Galegas adícase ao escritor de Monforte Lois Pereiro. Pinchando nas imaxes podedes acceder á súa biografía, poemas musicados, páxina web, comentarios sobre á súa obra...

As actividades no noso instituto terán lugar o venres día 13 a partir das 12.50 horas.

9 de maio, Día de Europa

2011-05-09T00:05:00.004+02:00

O Día de Europa é unha celebración anual de paz e unidade europeas.

O 9 de maio de 1950, Robert Schuman, Ministro francés de Asuntos Exteriores, presentou a proposta denominada "Declaración Schuman", aínda recente a Segunda Guerra Mundial, na que invitaba a Francia, Alemaña e outros países europeos a mancomunar a súa produción de carbón e aceiro e, deste xeito, propuña asentar unha paz duradeira no territorio europeo e dar un primeiro paso cara a unha unificación económica. Hoxe a súa declaración considérase a partida de nacemento da Unión Europea e, desde 1985, en ocasión do centenario do nacemento de Schuman, a Comisión Europea decidiu designar o 9 de maio como Día de Europa.

Para 2011, o lema para o Día de Europa é: "coñece os teus dereitos e exérceos". Por iso, a Comisión Europea invita a consultar o portal A túa Europa, onde poderanse coñecer todos os dereitos que se teñen como cidadán da Unión Europea.

O Día de Europa, é un dos símbolos da Unión Europea, xunto co euro, a bandeira e o himno, polo que se celebran actividades e festexos que achegan Europa aos seus cidadáns e hermanan aos distintos pobos da Unión Europea.

En Lugo, os actos de conmemoración son na Praza Maior de 11:00 a 14:00 e de 17:00 a 20:00 horas.

Por unha banda, instalarase un punto de información onde os que se acheguen poderán coñecer os aspectos máis relevantes da Unión Europea. Todos os asistentes recibirán un pack con material divulgativo da UE, folletos, globos, etc.

Por outra, celebraranse talleres de animación e dinamización dedicados especialmente a nenos de 5 a 12 anos (gymkhana cultural, bandeiras de Europa, puzzle no chan das bandeiras dos países integrantes da UE, taller "Debuxa Europa", taller "Eurochapas", Xogos colectivos...)

O acto institucional será ás 12 e rematarase co izado de bandeira e a interpretación do himno europeo.

Infórmate sobre a UE e atopa recursos para aprender ludicamente nestes enlaces:

http://www.aulaintercultural.org/article.php3?id_article=823

http://europa.eu/index_es.htm

...Regálovos un conto

2011-05-06T19:20:00.048+02:00

---Neste impasse literario
(pasado xa o Día do Libro, e aínda por chegar o
das Letras Galegas), vou... e regálovos un conto!

----Titúlase “Pensamentos no soto”, e di así:

---------A pelota atravesou a fiestra rota e caeu

no corredor do soto. Unha das nenas, a filla de catorce anos dos conserxes, baixou bambeando a buscala. Á pobre o tranvía cortoulle a perna por baixo do xeonllo, e sentíase feliz cando podía recoller pelotas para os demais.

------No soto reinaba a penumbra, pero de todas formas chamoulle a atención algo que se movía no recuncho.

----—Minino! —dixo a rapariga de perna de pau da conserxería—.
E ti que fas aquí, gatiño?
----Alzou a pelota e, como puido, apresurouse a levala.
----A vella, sucia e noxenta rata —foi a ela a quen confundiron cun gatiño— sorprendeuse. Así non lle falara nunca ninguén.
----Ata agora só a odiaron, lanzáronlle pedazos de carbón ou fuxiron aterrados ante a súa presenza.
----Por primeira vez ocorréuselle pensar o diferente que tería sido todo se, por exemplo, nacera gato.
----É máis —porque así de insaciables somos!—, continuou tecendo as súas fantasías. E se nacese para ser a rapariga de perna de pau da conserxería?
----Pero iso xa sería demasiado fermoso. Non llo puido nin imaxinar.

István Örkény
Contos dun minuto

----Ah!!... É que os contos non serven soamente para durmir aos pequenos, senón tamén para manter espertos aos maiores.

Canal de ciencia e tecnoloxía

2011-05-04T17:48:00.003+02:00

A Fundación Española de Ciencia e Tecnoloxía acaba de presentar un canal de televisión por internet sobre ciencia e innovación de servizo público (FECYT.tv). O seu obxectivo é producir e difundir información de actualidade científica.

O canal presentouse a semana pasada en Madrid, coa finalidade de ser unha ferramenta para que distintas institucións poidan dar a coñecer as súas investigacións ao gran público. Tamén tratará de involucrar a profesores e alumnos para participar na elaboración de material divulgativo.

Se queres acceder preme aquí.

BASES DO CONCURSO "ADIVIÑA, ADIVIÑA...", 2011

2011-04-24T00:57:00.001+02:00

Con motivo da celebración o día 12 de maio como Día escolar das Matemáticas o Departamento de Matemáticas e a Biblioteca do IES Xoán Montes convocan un concurso entre o alumnado do centro para resolver un boletín de adiviñas, de acordo as seguintes bases:

1-Os participantes deben ser alumnos de 1º ciclo de ESO do IES Xoán Montes no ano escolar 2010/2011.

2- Os participantes resolverán o maior número posible das adiviñas propostas.

3- O boletín de participación pódese solicitar aos profesores de matemáticas correspondentes, ou ben descargalo desta mesma anotación.

4- A solución das adiviñas introducirase nun sobre grande no que deberá figurar fóra o seudónimo do participante e o nome do concurso. Dentro deste sobre grande ademais introducirase outro sobre máis pequeno cos datos do participante (nome, apelidos, curso e grupo) e entregarase en secretaría.

5- O prazo de admisión pecharase o día 30 de maio de 2011.

6- O xurado estará composto polas profesoras Mª Dolores Cousido Piñeiro, Covadonga García-Losa Rodríguez e Mª Teresa Vázquez Cadavide. O fallo será inapelable e emitirase o día 10 de xuño. O xurado pode declarar o premio deserto.

PREMIO:

Xoán Montes... Sóache?

2011-04-24T00:38:00.012+02:00

Do luns 25 ao venres 29, desenvolveranse os actos de homenaxe a Xoán Montes.

O luns, ás 19:30 no Museo inaugurarase unha pequena exposición dedicada a Xoán Montes. Nela vanse expoñer uns paneis informativos para acceder á información sobre o músico, e unhas vitrinas que conterán obras manuscritas súas, entre elas a Negra sombra. Tamén se exporán moitas outras obras, obxectos e documentos de interese. Despois dunha breve presentación formal pasarase a escoitar o que promete ser un delicioso concerto, a cargo da soprano Carmen Subrido acompañada por Xoán Elías Castiñeira (brillante exalumno deste centro). Van interpretar as Baladas galegas de Xoán Montes, que tan poucas veces soan (Doce sono ou Lonxe da terriña)

Acompañando á exposición haberá todos os días concertos e conferencias de distinto tipo, onde se poderá escoitar moitísima música de Xoán Montes.

Á saída de cada concerto farase un modesto agasallo ao público. O último día repartirase o CD de Dous séculos de música lucense que por fin saíu á luz.

O programa de actos promete, e é unha gran oportunidade de achegarse a este gran músico, en cuxo honor leva o nome o noso instituto.

Xoán Montes... fai que che soe!

23 de abril...

2011-04-23T08:07:00.011+02:00

Día do Científico Galego, 23 de abril

2011-04-23T00:57:00.007+02:00

A Real Academia de Ciencias homenaxea este ano ao matemático e astrónomo Ramón Mª Aller (Lalín, 1878-1966). Estudou no seminario de Lugo e con vinte anos doutorouse en Teoloxía. Máis tarde faría a carreira de Ciencias Exactas na Universidade de Madrid.

Comenzou as súas primeiras observacións astronómicas na galería da súa casa. Desde 1939 é profesor na Universidade de Santiago de Compostela. En 1943 constrúese un observatorio na universidade ao que traslada os seus instrumentos de Lalín e en 1944 créase a Cátedra de Astronomía para el.

Ramón Mª Aller foi o precursor do estudo das estrelas dobres e múltiples, das que descubriu nove, e é a día de hoxe un referente internacional.

O astrónomo ingles P. Wilkins, que foi quen confeccionou o primeiro mapa da Lúa, quixo inmortalizar a este matemático e astrónomo, bautizando co seu nome un dos cráteres da Lúa.

22 de abril, Día da Terra

2011-04-22T09:31:00.043+02:00

Pódese vivir unha longa vida sen aprender nada.

Pódese durar sobre a terra sen agregar nin cambiar unha pincelada de paisaxe. Pódese simplemente non estar morto sen estar tampouco vivo.
Basta con non amar, nunca, a nada, a ninguén.
É a única receita infalible para non sufrir.
Pero un día descubrín que aínda podía facer algo
para estar completamente viva antes de estar definitivamente morta.
Entón, púxenme en movemento.

----Hoxe celébrase en todo o mundo o Día da Terra. Desde 1970 estableceuse o 22 de abril co obxectivo de crear unha conciencia común fronte aos problemas de contaminación, a conservación da biodiversidade e demais temas relacionados coa protección do medio ambiente.

----Dous anos máis tarde celebrouse a Primeira Conferencia Internacional sobre o Medio Ambiente. Aproveitáronse tamén as celebracións para o lanzamento da película de Disney, 'Océanos', un documental sobre a vida nas profundidades do planeta.

----En tanto, a NASA (a Axencia Espacial Norteamericana) tamén presentou un especial fotográfico, ao cal é posible acceder facendo clic aquí.

----E nós... Que facemos hoxe pola Terra? A quen imos culpar despois? Onde imos ir cando non haxa onde ir?

----Imos, érguete, fai algo máis que ollar, aceptar e resignarte. O tempo de durmir pasou.

Día da creatividade

2011-04-21T00:08:00.001+02:00

Todos posuímos un talento, todos temos a capacidade de ser creativos; e a maioría vivimos sen sabelo, convencidos moitas veces de que o creativo é aquel que sabe compor melodías, ou escribir unha poesía. Ken Robinson, experto en desenvolvemento da creatividade, e entrevistado no segundo destes vídeos, correspondente a un dos dous capítulos que o programa Redes dedica á creatividade, nos di "a creatividade apréndese igual que se aprende a ler" e "cando nos apaixona o que facemos e ademais temos a preparación adecuada para facelo ben, estamos no noso elemento, un estado marabilloso no que traballamos sen cansazo e con gran creatividade".
Así que a clave tamén está en querer aprender a ser creativos e saber que nos apaixona, ti xa o sabes?

BASES DO CONCURSO "ADIVIÑA QUEN SON", 2011

2011-04-17T13:55:00.020+02:00

1-Os participantes deben ser alumnos de 2º ciclo de ESO ou BACHARELATO do IES Xoán Montes no ano escolar 2010/2011.

2- Os participantes resolverán o maior número posible das adiviñas propostas.

3- O boletín de participación pódese solicitar aos profesores de matemáticas correspondentes, ou ben descargalo desde este blog (nesta mesma anotación ou no menú lateral).

5- O prazo de admisión pecharase o día 30 de maio de 2011.

PREMIO:

Medio pan e un libro

2011-04-15T20:24:00.039+02:00

Tráiovos un delicioso discurso
de Federico García Lorca que, en 1931,
dixo con motivo da inauguración
da biblioteca de Fuente Vaqueros,
o seu pobo natal.

Alguén rescatouno,
e aparece no blog
“Cuentos de brujas y otras zarandajas“

Hoxe quero eu rescatalo
para a nosa biblioteca, aproveitando
a proximidade do Día do Libro.

“Medio pan e un libro”

----Cando alguén vai ao teatro, a un concerto ou a unha festa de calquera índole que sexa, se a festa é do seu agrado, recorda inmediatamente e lamenta que as persoas que el quere non se atopen alí. ‘O que lle gustaría isto á miña irmá, ao meu pai’, pensa, e non goza xa do espectáculo senón a través dunha leve melancolía. Esta é a melancolía que eu sinto, non pola xente da miña casa, que sería pequeno e ruín, senón por todas as criaturas que por falta de medios e por desgraza súa non gozan do supremo ben da beleza que é vida e é bondade e é serenidade e é paixón.

----Por iso non teño nunca un libro, porque regalo cantos compro, que son infinitos, e por iso estou aquí honrado e contento de inaugurar esta biblioteca do pobo, a primeira seguramente en toda a provincia de Granada.

----Non só de pan vive o home. Eu, se tivese fame e estivese desvalido na rúa non pediría un pan; senón que pediría medio pan e un libro. E eu ataco desde aquí violentamente aos que soamente falan de reivindicacións económicas sen nomear xamais as reivindicacións culturais, que é o que os pobos piden a berros. Ben está que todos os homes coman, pero que todos os homes saiban. Que gocen todos os froitos do espírito humano porque o contrario é convertelos en máquinas ao servizo do Estado, é convertelos en escravos dunha terrible organización social.

----Eu teño moita máis mágoa dun home que quere saber e non pode, que dun famento. Porque un famento pode acougar a súa fame facilmente cun anaco de pan ou cunhas froitas, pero un home que ten ansia de saber e non ten medios, sofre unha terrible agonía porque son libros, libros, moitos libros os que necesita, e onde están eses libros?

----Fai aquí unha palabra máxica que equivale a dicir: ‘amor, amor’, e que debían os pobos pedir como piden pan ou como anhelan a choiva para as súas sementeiras. Cando o insigne escritor ruso Fedor Dostoyevsky, pai da revolución rusa moito máis que Lenin, estaba prisioneiro na Siberia, afastado do mundo, entre catro paredes e cercado por desoladas chairas de neve infinita; e pedía socorro en carta á súa afastada familia, só dicía: ‘¡Enviádeme libros, libros, moitos libros para que a miña alma non morra!’. Tiña frío e non pedía lume, tiña terrible sede e non pedía auga: pedía libros, é dicir, horizontes, é dicir, escaleiras para subir o cume do espírito e do corazón. Porque a agonía física, biolóxica, natural, dun corpo por fame, sede ou frío, dura pouco, moi pouco, pero a agonía da alma insatisfeita dura toda a vida.

Campus científicos de verán 2011

2011-04-14T23:13:00.003+02:00

Estás cursando cuarto curso de Educación Secundaria Obrigatoria ou primeiro curso de Bacharelato da área científica? Naciches con posterioridade ao 31 de decembro de 1993? Tés unha nota media no curso escolar 2009-2010 igual ou superior a 7,5 puntos?

Fai a túa solicitude!

So terás que realizar unha proba de coñecementos de resposta alternativa a través de Internet, e poderás disfrutar dun verán distinto, contactarás co labor investigador, convivirás con estudantes de todo o territorio español nun ambiente universitario, coñecerás posibilidades de proxección profesional e ademais poderás gozar de actividades complementarias cientifico-culturais e de lecer durante 14 intensos días.

A que esperas? Os dous alumnos do instituto que foron o verán pasado pasárono xenial.

Olimpíada Matemática

2011-04-13T21:00:00.002+02:00

Queremos felicitar a todos os participantes na Olimpíada Matemática de 2º de E.S.O. e, particularmente, darlles ánimos a David e Juan que superaron a fase de zona e irán o 20 de maio a Vigo a competir na final galega.

Os parabéns son tamén para a súa profe Lola que ben se pode enorgullecer deles.

23 de abril, Día do Libro: TODOS LEMOS

2011-04-11T13:23:00.001+02:00

Este ano, para conmemorar o Día do libro, lemos todos. Un grupo de alumnos e un profesor len textos de autores representativos das linguas que nos son máis próximas, entre eles Ana Mª Matute, que recibe este ano o premio Cervantes.

Para escoitar os textos premede nas imaxes.

E no cotián... a poesía: J. Luís Calvo

2011-04-07T22:40:00.004+02:00

Presentamos hoxe a obra dun poeta ben coñecido por nós. Hai pouco visitou o noso centro para compartir unha tarde cos participantes no obradoiro literario organizado pola biblioteca durante o mes de febreiro. José Luís Calvo Vidal entretece vida e poesía, por iso afirma: TI ES A MIÑA ESCRITURA/O MEU POEMA É A TÚA REALIDADE. Estes versos, como o poema que ofrecemos a continuación, forman parte da súa última obra Cantos de docedume, recentemente presentada en Lugo.

(mar das Catedrais)

É o teu corpo tamén este mar.
Brúe e medra e abísmase
coa noite e repousa no día
sobre o frío do abrente.
Latexa en min como latexa o meu sangue

e asolaga ditoso a miña dor.

6 de abril, día da Actividade Física

2011-04-06T16:00:00.000+02:00

Hoxe, día 6 de abril, celébrase en todo o mundo o Día Mundial da Actividade Física. Dita data foi instaurada no ano 2002 pola Organización Mundial da Saúde (OMS) planteándose como obxectivo a necesidade de difundir os beneficios da práctica da actividade física polo menos trinta minutos diarios.

A OMS no ano 1946 definiu a saúde como "un estado completo de benestar físico, mental e social, non soamente a ausencia de enfermidades ou afeccións".
O concepto de actividade física abarca o movemento, a interacción, o corpo e práctica humana. Ten tamén tres dimensións: biolóxica, persoal e sociocultural. Desde unha visión biolóxica defínese como calquer movemento corporal realizado polos músculos que leva asociado un gasto de enerxía.

Unha boa definición debería integrar as tres dimensións citadas: "A actividade física é calquer movemento corporal intencional que resulta nun gasto de enerxía e nunha experiencia persoal, e permítenos interactuar cos seres e co ambiente que nos rodea".

Algunhas características de ésta, orientada a Saúde, son: ser moderada, habitual e frecuente, orientada, satisfatoria, social, igualitaria na competición e acorde a idade e as características psicofísicas dos practicantes.

Boletín nº 6: Tempo de poesía

2011-04-05T15:26:00.000+02:00

Iniciado xa o mes de abril, no que celebraremos o día do libro, publicamos este boletín de información bibliográfica que contén só algunhas das últimas adquisicións do xénero poético.

Enche a túa vida de poesía... visita a biblioteca, e lembra que podes propor que se merquen para a biblioteca aqueles libros que non atopes.

2 de abril, Día do Libro Infantil e Xuvenil

2011-04-02T11:46:00.002+02:00

Todos os anos, o 2 de abril, o IBBI (Internacional Board on Books for Young People) celebra o día do libro infantil e xuvenil, co fin de conmemorar o nacemento do escritor danés Hans Chistian Andersen. Cada ano un país é o encargado de editar o cartel anunciador e a mensaxe dirixida a todo os nenos do mundo. Este ano 2011 o encargado é Estonia.

O cartel foi realizado por Jüri Mildeberg e Jüri Dubov. A mensaxe é de Aino Pervik e podedes lela se pinchades aquí.

Día da Diversión no Traballo

2011-04-01T17:05:00.003+02:00

O 1 de abril é, desde 1996, o Día Internacional da Diversión no Traballo (Fun at Work Day). Aínda que non ten a categoría doutras conmemoracións e non está respalda por organismos oficiais (parece ser), é igualmente unha ocasión especial para recordar que o traballo non ten por que ser gris, que a seriedade non require solemnidade, e que o humor ofrece importantes beneficios para calquera organización e para o seu equipo humano.
Os sorrisos son moi saudables. Aos monxes da Idade Media estáballes prohibido rir. Con todo, hoxe en día un neno ri 300 veces ao día e ao chegar a adulto rirá soamente 15. É unha pena, porque un minuto de risa equivale a 45 minutos de relaxación, unha gargallada move máis de 400 músculos, rir libera endorfinas (un sedante natural do cerebro que logra efectos similares aos dun analxésico). A risa tamén estimula o bazo, elimina toxinas, lubrica e limpa os ollos, fai vibrar a cabeza, despexa nariz e oídos, axuda a facer a dixestión e reduce os ácidos graxos.
A que esperamos para obter tantos beneficios de balde?

Hai dous artigos moi interesantes que publicou La Voz de Galicia no suplemento de La voz de la escuela sobre a importancia do humor no ámbito persoal, escolar e laboral. Rescateinos hoxe pero valerían para calquera día, na escola tamén é moi importante divertirse, coa risa apréndese moito mellor.

la risa

Día da liberdade dos documentos (DFD)

2011-03-30T05:40:00.011+02:00

Hoxe 30 de marzo celebramos en todo o mundo o Día da Liberdade dos Documentos (en inglés Document Freedom Day - DFD). Trátase dunha iniciativa da Free Software Foundation que pretende chamar a atención sobre a importancia da redacción, publicación e difusión de documentos en formatos abertos, así como do uso xeral de códigos abertos que garantan a interoperabilidade e a liberdade de elección de aplicacións informáticas.

En Lugo, o Centro de Innovación Social abre as súas portas coa intención de explicar en que consisten os formatos e estándares abertos. Ademais, todas as persoas que así o desexen poderán instalar na súa computadora o OpenOffice ou LibreOffice. O centro está situado na Travesa de Frei Plácido Rei Lemos e estará aberto de 10 da mañá a 2 da tarde e de 4 a 6 da tarde.

DE MAIORES A PEQUENOS

2011-03-29T12:26:00.002+02:00

O club de lectura "As estantigas veteranas" visitou o pasado 24 de febreiro o CEIP Quiroga Ballesteros. Fomos compartir uns contos cos máis pequenos: A figueira de Pelostortos, El gallo Quirico e Croco. Os pequenos, de cinco e seis anos, quedaron enfeitizados coa teatralización que os maiores fixeron das lecturas. Os maiores disfrutaron coa cara de asombro e coa atención prestada polos cativos e viron recompensado o traballo que tantos recreos lles ocupou. Todo un pracer para todos. Graciñas aos profes do cole pola acollida que lle deron á actividade e a hospitalidade coa que nos recibiron. Cun chocolate con churros no camiño de volta ao instituto, rematamos a actividade. Dispostos a repetila, quen sabe onde?

Por onde andan os clubes de lectura?

2011-03-28T13:00:00.002+02:00

Aínda que xa hai un tempo que non aparecemos por aquí, todos estamos a elo.

Os Estantigas veteranos andan lendo "Na cerna da selva" de Pepe Tobarnela e os máis novos, Estantigas 1 e 2, están pasando un pouco de medo, segundo din, coa lectura de "La sombra del gato y otros relatos de terror" de Concha López Narváez.

Recordade que a próxima reunión é o venres 8 de abril no recreo.

Como podedes ver, estreamos a imaxe que nos identificará de agora en diante. Moitísimas grazas ao seu autor.

PREMIOS CLIMÁNTICA

2011-03-27T18:57:00.000+02:00

Poderán participar todos os estudantes matriculados en calquera centro educativo noeste curso, e o prazo de presentación de traballos queda aberto desde a data de comunicación na web de Climántica ata o 31 de maio do 2011. Esta edición vai ter un carácter virtual e polo tanto os traballos terán que ser subidos á páxina web do congreso antes das 24 horas do último día de prazo. Dentro do apartado “Como participar?” encóntranse seis titoriais (dous por nivel) en vídeo e en formato pdf con todos os pasos a seguir para cargar os traballos na plataforma, segundo sexa formato de documento (pdf, Powerpoint, Word, OpenOffice), imaxe ou vídeo.

Todos os traballos se publicarán no n.º 4 da revista CLMNTK e os da categoría multimedia, ademais, poderanse ver na sección Alumnos do apartado Biblioteca de climantica.org.

Os traballos que optan á categoría de premios xerais, consistentes en campamentos ambientais de verán, deberán realizarse de forma individual ou por parellas. Os que superen o número de dous, incluiranse na categoría de premios especiais a grupos grandes: teatro, dramatizacións, coros, etc.

Os traballos terán que ver coas temáticas do proxecto e tomarán como referencia os seguintes xéneros:

1. Relatos 2. Poesía 3. Curtos cun guión ambiental 4. Vídeos musicais 5. Vídeos de obras de teatro 6. Fotografía comentada 7. Banda deseñada 8. Presentacións 9. Póster 10. Debuxos 11. Reportaxes multimedia 12. Xogos e pasatempos

Tedes moitas posibilidades para escoller aquela que máis vos guste!
Pincha na imaxe e infórmate de como participar!

Apaga a luz, acende o planeta

2011-03-26T10:00:00.008+01:00

A HORA DO PLANETA:

MOITO MÁIS QUE UNHA HORA

20:30, sábado 26 de marzo de 2011

Hoxe, ás 20:30, individuos,
comunidades, empresas e gobernos de todo
o mundo apagarán as súas luces durante unha hora -A Hora do Planeta-, trascendendo todas as barreiras de relixión, cultura, sociedade, xeración e localización xeográfica nunha celebración global polo Planeta.

----Esta nova edición, baixo o lema 'Apaga a luz, acende o Planeta', ten como obxectivo movilizar a máis de 1.000 millóns de persoas nos cinco continentes, para que apaguemos as luces dos nosos fogares por espazo dunha hora -entre as 20,30 e as 21,30-.

----O obxectivo desta iniciativa é concienciar da necesidade de reducir o noso consumo enerxético para loitar contra o cambio climático e o aumento das temperaturas.
----Durante a Hora do Planeta 2010, cidadáns de 128 países de todos os continentes apagaron as súas luces para simbolizar a loita contra o cambio climático.

¿COMO PODES PARTICIPAR?
----Uníndoche hoxe ao apagón, e ademais se entras en:
www.horadelplaneta.es/participa-ciudadanos.php descubrirás máis formas de participar.

------

JOHN MILNOR, PREMIO ABEL

2011-03-26T08:58:00.001+01:00

John Milnor, matemático estadounidense da universidade novaiorquina de Stony Brook, é o gañador este ano do premio Abel de matemáticas polos seus "descubrimentos pioneiros en topoloxía, xeometría e álxebra". O premio otórgao a Academia Noruega de Ciencias e Letras e considérase o premio Nobel de matemáticas.

Para ler máis pincha aquí.

ILUSTRADORES GALEGOS

2011-03-25T19:47:00.007+01:00

Aproveitando a excelente idea promovida pola biblioteca de fomento da lectura a través dos cómics, o Equipo de Normalización Lingüística do IES Xoán Montes deciciu facer unha sinxela exposición dos traballos de varios ilustradores e deseñadores gráficos de Galicia, acompañados dunha breve reseseña biográfica.

Podedes vela na entrada do instituto.

(Feito por Anxos e Meri)

Falamos de drogas

2011-03-24T23:16:00.002+01:00

O noso instituto participou onte xunto con outros centros de Lugo no debate "Falemos de Drogas", no Auditorio Gustavo Freire, dentro do programa do mesmo nome organizado pola fundación “La Caixa”.

O programa educativo iniciouse en Lugo o pasado 26 de xaneiro cunha sesión de formación para o profesorado de Educación Secundaria, sobre neurobioloxía da adicción e efectos das drogas no cerebro. Nesa sesión entregouse a todos os profesores os materiais educativos do programa de prevención, que tratan dos efectos das drogas no cerebro, no corpo e no comportamento. A partir de aquí, profesorado e alumnos analizaron en clase durante dous meses as consecuencias das substancias tóxicas sobre o sistema nervioso, visitaron a exposición “Falemos de Drogas” en Lugo e prepararon as preguntas para o debate.

Do traballo realizado nas clases das profesoras María Inmaculada e Leonor foron seleccionadas as seguintes preguntas, presentadas por outros tantos alumn@s de 3º e 4º da ESO:

que efectos ten o consumo de cristal? (Belén Encabo), por que o consumo de cocaína produce inapetencia sexual? (Beatriz Álvarez), e pódese volver a ser como antes despois de abandonar o consumo de drogas? (Antonio Guglandiolo).

A estas e moitas máis preguntas deu resposta o Dr. Rafael Maldonado, Catedrático de Farmacoloxía da Universidade Pompeu Fabra, experto no tema, favorecendo a reflexión e desmentindo algúns mitos sobre o mundo das drogas.

Os estudantes, pasaron de ser meros receptores a partícipes activos dun debate importante, pero desde unha perspectiva diferente: a científica.
En resumo, unha actividade moi enriquecedora que hai que agradecer á fundación "La Caixa" así como as profesoras e alumnado que colaboraron activamente.

Máis información premendo AQUÍ e na imaxe de enriba.

Semana cultural da Escola Oficial de Idiomas

2011-03-21T23:59:00.004+01:00

Que é a poesía?

2011-03-21T00:05:00.001+01:00

"Debo dicirvos que non atopei a ninguén que fale da poesía mellor que os propios poetas". Platón

Na nosa biblioteca tamén queremos homenaxear á poesía no seu día. Non atopamos nada mellor que as emotivas lecturas poéticas coas que os alumnos e alumnas, aos que damos os parabéns polo esmerado traballo, nos deleitan. Para escoitalas so tedes que pinchar na pestana de Audios que aparece arriba. Agradecemos o gran traballo de Pilar, que fixo posible esta fermosa actividade.

21 de marzo, Día Mundial da Poesía.

2011-03-20T23:54:00.000+01:00

A poesía ten mil caras e nace sempre do máis profundo das culturas dos pobos. Desde hai moito tempo, a Organización das Nacións Unidas, a Ciencia e a Cultura (UNESCO) ven respaldando o traballo dos poetas, editores e profesores do mundo enteiro.

Este ano, novamente, con motivo do Día Mundial da Poesía, a UNESCO desexa lembrar a importancia artística e o vigor da poesía, co fin de promover a lectura.
Tamén é importante comprender os profundos lazos que unen á poesía con todas as demais artes e técnicas, que lle sirven ao home para dar sentido ao mundo no que vive. Dicía Mallarmé que a poesía é "a expresión, por a linguaxe humana devolta ao seu ritmo esencial, do sentido misterioso dos aspectos da existencia".
A poesía non só sirve para comunicar ideas e/ou transmitir información, senón que, a costa do labor incesante la lingua, mantén vivo o verbo humano e revela sempre o brillo orixinal da cultura.

Así, propoñemos unha serie de enlaces a páxinas onde se recolle poesía doutras latitudes, culturas, relixións, etc.:
-Poesía árabe. Unha web onde atoparedes a tradución dalgunha das obras de poetas árabes tan importantes como Adonis ou Mahmud Darwish.
-Poetas chinos. Unha web onde atoparedes reseñas biográficas e poemas de diferentes autores chinos.
-Cien poemas Zen Un blog dedicado á poesía oriental.
-Poetas africanos. Desde aquí poderedes acceder a unha antoloxía de poemas escritos por autores africanos que tocan diversos temas moi variados, entre eles, o atentado do 11M en Madrid.
-Papusza, poetisa romaní. Un post de Demetrio Gómez onde da a coñecer a figura e a obra dunha poetisa romaní/xitana e polaca que todos deberiamos de coñecer.

Preséntome

2011-03-18T20:00:00.009+01:00

Ola,
Son Pilar, e voume incorporar á comunidade do "sorriso" disposta a dar moita tralla.

Quérome estrear -como non!- cunha invitación á lectura, aínda que xa sei que vós gustades dabondo do pracer de ler.

Velaí tedes a miña invitación:

Saúdos a todas e a todos

Vémonos!
---Lémonos!...
---------Sorrímonos!

Máis perto de Saramago

2011-03-18T00:02:00.009+01:00

Hoxe, 18 de marzo, cúmprense nove meses da morte de José Saramago. Nove meses que é o que se tarda en morrer, segundo deixou escrito o autor en O ano da morte de Ricardo Reis, porque nove meses é o que, polo xeral, se tarda en nacer. Por iso, a Fundación Saramago decidiu despedir ao escritor abrindo a súa casa e a súa biblioteca da illa de Lanzarote, para que os seus amigos, os seus lectores e as persoas que necesiten ver como, onde e de que xeito traballaba e vivía o escritor, poidan percorrer o conxunto que habitou a maior parte dos seus últimos anos de vida e onde escribiu os seus libros.

A partir do día 21, desde as 10 da mañá ata as 14 da tarde poderase visitar a casa e a biblioteca en grupos reducidos de non máis de 15 persoas. A Casa estará aberta ao público de luns a sábado, incluídos estes, e o percorrido realizarase cada media hora con dous guías. Os visitantes recibirán un folleto explicativo da casa e dos lugares que Saramago máis habitaba. Ao pasar pola cociña, servirase un café portugués. Ao final do percorrido haberá unha tenda con libros de José Saramago en todos os idiomas, así como discos, filmes, cadernos, postais e outras formas de achegamento ao escritor.

Para os que admiramos ao escritor, Saramago nunca morrerá, quedan os seus libros, fiel testemuña de que pervive, como todo o que segue a existir na memoria.

Nova Biblioteca de Signos Didáctica

2011-03-17T09:00:00.002+01:00

A biblioteca virtual Miguel de Cervantes inaugurou o 8 de marzo a Biblioteca de Signos Didáctica, dotada de material adaptado ao alumnado xordo cunha lección en Lingua de Signos Española (LSE) titulada "O corpo humano. Os cinco sentidos". En breve publicaranse máis contidos que versarán sobre bos hábitos para unha alimentación sa e variada, o recoñecemento de obxectos presentes no camiño de casa á escola, o deporte e a expresión de emocións e sentimentos, entre outros temas.

Desta forma, pretende ofrecer un novo recurso co que cubrir en parte a ampla gama de disciplinas de educación primaria e secundaria, para as que "escasean na actualidade" materiais didácticos para este alumnado. Este novo espazo conterá, ademais, explicacións teóricas en LSE con subtítulos en español, e numerosas actividades interactivas coas que traballar.

A biblioteca virtual Miguel de Cervantes ten como principal obxectivo a difusión da literatura e as letras iberoamericanas no mundo, e ofrece, a través da rede, libre acceso a máis de 130.000 rexistros bibliográficos.

Tedes o enlace permanente no apartado de lectura.

Poesía na biblioteca

2011-03-15T07:39:00.002+01:00

Como xa anunciamos, este xoves asistimos á clausura do obradoiro de literatura. A verdade é que estivo chea de sorpresas, os alumn@s, a quen damos os parabéns polo seu gran traballo, recitaron as súas inspiradas creacións, puidemos disfrutar dun conto que escribiron e das felicitacións e consellos dos profesores, Joaquín Carballido e Paco Reija. A eles vai o noso agradecemento polo seu magnífico labor, realmente desbordan tanto amor á literatura que contaxiáronnos a todos á vez que rimos cos seus sempre enxeñosos comentarios.

Por outra banda tivemos a gran sorte de poder disfrutar das palabras de J. Luís Calvo Vidal, escritor moi vinculado a Lugo. Presentounos o seu último libro chamado Cantos de docedume, deleitounos con poesía súa inédita, transmitíndonos toda a maxia que envolve a creación do poeta, animando a escribir, respondendo ás dúbidas dos asistentes... A el tamén lle agradecemos inmensamente a súa desinteresada e enriquecedora participación.

E vistes como lucía, con tantos poetas, poetisas e poesía, o sorriso da nosa biblioteca?

CÓMICS, PARA VER E LER

2011-03-11T15:23:00.006+01:00

Durante os meses de marzo e abril temos á vosa disposición unha selección de cómics no punto de lectura. Consta de corenta títulos: clásicos como Tintín, Astérix, Mafalda... e outros de actualidade como Emigrantes, MAUS, Persépolis... Son un préstamo da Fundación Germán Sánchez Rupérez dentro do seu programa Lecturas de ida e volta. A todos eles sumánse os que nos presta o I.E.S. Fernando Esquío de Neda.

E para completar, tamén podedes disfrutar da exposición sobre a historia do cómic, grazas ao traballo da nosa amiga Begoña López Soto, e dun boletín de participación cun encrucillado para resolver e gañar premios ao rematar a exposición.

Obradoiro de literatura

2011-03-09T12:00:00.006+01:00

Nas tardes dos mércores estase a desenvolver na biblioteca un obradoiro de literatura, no que participan alumnos de todos os cursos interesados na escritura. Este obradoiro está guiado por Joaquín Carballido e Paco Reija.

O xoves día 10 contaremos coa presenza do escritor e profesor Luis Calvo Vidal que nos presentará o seu último libro.
Convidamos a todos a participar neste evento a partir das catro da tarde.

Semana da prensa

2011-03-09T10:16:00.000+01:00

Por que ler o xornal?

Prensa-Escuela propón 7 razóns:

1.Lendo o xornal aprenderás a escribir e expresarte mellor.

2.Estarás informado do que acontece ao teu redor e poderás opinar sobre distintos temas.

3.Poderás reflexionar sobre a actualidade, ser máis crítico e que non che dean gato por lebre.

4.Saberás de que falan os maiores, poderás discutir con eles sobre temas importantes e, mesmo, ¡levarlles a contraria!

5.O xornal será o teu mellor libro de texto: distinto cada día.

6.Converterase na túa novela de aventuras favorita e irá contigo toda a vida.

7.E saberás que poñen no cinema, na tele, que se leva esta tempada, como vai a Liga… E moitas máis cousas que de seguro che interesarán.

Para saber máis pincha aquí.

Ademais dos xornais que diariamente sabedes que están no punto de lectura, o xoves e venres desta semana (10 e 11) haberá exemplares doutros xornais en distintas linguas que poderedes utilizar.

Imaxes que nos lembran...

2011-03-08T12:15:00.001+01:00

Grazas a todas esas mulleres que sempre loitaron polos seus dereitos, os nosos dereitos, e grazas as que seguen traballando e loitando.

8 de marzo, Día Internacional da Muller

2011-03-07T21:56:00.001+01:00

Mulleres, avoas, fillas, netas... o día 8 de marzo é o voso día! Un día para lembrar o papel e a dignidade das mulleres no proceso de conciencia do seu valor humano dentro da sociedade.

Un día para contestar, para rexistrar, e espertar ao mundo para a importancia da actuación da muller en todos os ámbitos. Un día é pouco para celebrar unha loita constante, diaria, e sen descanso. Un día é pouco para recoñecer a participación das mulleres na construción dunha familia, e na conquista do mercado de traballo, na loita pola súa liberdade de pensamento, de elección,...

O 8 de marzo

Este día específico adicado as mulleres débese a un tráxico feito que ocorreu en Estados Unidos, no ano 1857. O día 8 de marzo dese ano, as mulleres que traballaban na fábrica téxtil de Nova Iorque, decidiron parar de traballar como protesta ás súas precarias condicións de traballo. Esa foi a primeira vez que as mulleres uníanse para reivindicar melloras, e polo tanto, os seus dereitos. Elas pedían unha redución do horario de traballo diario que era de 16 horas, en 10 horas diarias. Ademais, por traballar esas horas, elas recibían apenas un tercio do soldo que recibían os homes.
Pero a rebelión foi contida de forma violenta, culminando coa morte de 129 traballadoras, carbonizadas dentro da mesma fábrica. Anos despois, no 1910, durante unha conferencia internacional das mulleres realizada en Dinamarca, xurdiu a idea de crear unha data específica para homenaxear as operarias mortas nesa fábrica téxtil. E así foi que en 1975, a Asemblea Xeral das Organizacións Unidas (ONU) decretou o 8 de marzo como Día Internacional da Muller.

Cen por cen Seoane

2011-03-05T22:19:00.028+01:00

O pasado ano 2010 celebrábamos o centenario do nacemento de Luís Seoane. Con este motivo, a Fundación Caixa Galicia organiza unha exposición que percorre cen lugares da vida e a obra deste artista: Cen por cen Seoane. Cen anos cen lugares. O percorrido a través destes cen lugares conmemora os cen anos que cumpriría Seoane o pasado ano e tentan achegar ao espectador ao creador, á súa obra e ao contexto no que xurdiu. A mostra está composta de materiais moi diversos: pinturas, debuxos, gravados, carteis, libros, cartas, fotografías... e poderá visitarse en Lugo durante os meses de marzo, abril e maio.

O Ano Internacional da Química: imaxínate un día sen Química

2011-03-03T16:25:00.003+01:00

A química é a nosa vida, o noso futuro.

E ao fío da importancia da química e o seu uso cotiá, o domingo 27 de febreiro, na sección de ciencia do programa A vivir que son dos días da Cadea Ser, falaron do presente que está a química na nosa vida diaria: o colchón de látex, o metacrilato do espertador, a auga da ducha, o dióxido de cloro e o ozono que se utiliza na súa potabilización, o xabón e o xel, as fibras sintéticas coas que está feita a nosa roupa...

Podedes escoitalo en:

Química del despertar

Interveñen: Manuel Lozano Leiva (físico), Mercedes Alonso Giner (química), e Alfredo Pérez Rubalcaba (químico e vicepresidente do goberno).

Finanzas para tod@s

2011-03-02T01:23:00.004+01:00

O Ministerio de Educación, a Comisión Nacional do Mercado del Valores (CNMV) e o Banco de España, dentro do Plan de Educación Financeira, lanzaron a web finanzas para todos con gran cantidade de recursos para calquera con inquietudes económicas, desde como chegar a fin de mes ata consellos para invertir.

Tamén podemos atopar na mesma o portal Gepeese.es, dirixido aos estudantes de secundaria e aos profesores, e ideado para incluír os conceptos básicos da Educación Financeira nesta etapa educativa. No Portal pódense atopar actividades, recursos, materiais, hemeroteca, humor, xogos, pasatempos, guías didácticas con material de referencia para traballar conceptos como o aforro, os medios de pago, o consumo intelixente…

Achégate á economía!

Aniversario da morte de Cunqueiro

2011-02-28T14:14:00.004+01:00

Hoxe cúmprense trinta anos da morte de Alvaro Cunqueiro, un dos escritores galegos máis importantes do século XX. Con tal motivo, exemplares da súa obra estarán a disposición de todos no punto de lectura durante esta semana. Por outra parte, o 22 de decembro deste mesmo ano cumpriranse 100 anos do seu nacemento. Para conmemorar tal evento, a Biblioteca organizará unha exposición sobre a súa vida e obra a finais de ano.

Para saber máis sobre este autor, pincha aquí

24 de febreiro, Día de Rosalía de Castro

2011-02-23T12:26:00.000+01:00

O 24 de febreiro celebramos o Día de Rosalía de Castro, no que lembramos a súa vida e obra. No punto de lectura haberá exemplares da súa obra para aqueles que queiran recordala, ou ben, achegarse por primeira vez a ela.

Para saber máis pincha no retrato da escritora.

Gañadores da 2ª edición de MATEMÁTICAS NA MÚSICA

2011-02-20T15:41:00.006+01:00

Aquí temos aos gañadores deste ano. Os premios foron entregados o pasado 9 de febreiro. O xurado felicita a todos os participantes polo seu esforzo na pescuda das cancións, cada vez máis inxeniosas e divertidas sen perder por eso o seu contido matemático

Un ano máis o gañador resultou ser Christian Toimil de 1º de BAC que presentou a canción "La cumbia matemática" interpretada por Sin Codificar-Los Wikipedia. Quedaron finalistas Silvia Blanco de 2º de E.S.O., Marta Salgado de 1º de BAC e Sara Veiga de 2º de E.S.O. Parabéns para todos.

Para ver as finalistas pincha aquí.

Moito moito amor

2011-02-15T12:13:00.001+01:00

Non podemos deixar que pase o tempo sen felicitar a todos os que participaron na actividade "escolle un poema e regálao" , contra todo prognóstico, a carteira dos poemas repartiu uns 900, sen contar os que se puxeron para todo o claustro e persoal non docente, para todos os alumn@s e para os pais e nais.

Daba gusto ver a tod@s emocionados buscando o regalo perfecto en forma de poema, e de paso empaparnos coas delicadas verbas que tocan o noso corazón e nos fan escapar un sorriso.

MULLERES NOBEL: Unha visión non sexista da ciencia

2011-02-14T06:24:00.007+01:00

Do 14 de febreiro ao 1 de marzo está instalada no vestíbulo do instituto unha exposición dedicada a mulleres premio Nobel en Física, Química e Fisioloxía e Medicina.

Hai un panel dedicado a cada unha delas, no que podemos ver unha reseña da súa vida persoal e científica, as súas investigacións e achegas, así como as implicacións sociais e científicas dos seus logros.

Esta exposición formou parte da Semana da Ciencia 2010 en Santiago de Compostela. Agora móstrase no noso instituto grazas á amabilidade e xenerosidade de Pilar Arias e Monstserrat Nogueira, profesoras que desenvolven o seu traballo no Centro de Investigacións Biolóxicas da USC.
Moitísimas grazas a ambas.

12 de Rabi'-ul-Awwal (12 ربيع الأول )

2011-02-13T00:39:00.007+01:00

[escrito por Sohail Anwar & Said Bouchaib Chafil]

O día 12 de Rabi’-ul-Awwal os musulmáns celebramos o nacemento do profeta Mahoma (مولد النبي). Este ano coincide o día 15 de febreiro. Queremos explicarvos como celebramos esta festa nos países de onde vimos.

En Pakistán ese día moita xente sae á rúa con bandeiras e os imáns diríxense a eles con altofalantes para explicar cousas da relixión. A xente reúnese na mezquita para comer. A comida máis habitual é a cabra ou o polo con arroz.

En Marrocos, imos á mesquita para orar e despois o imán da mesquita fala da relixión e despois toda a familia se reúne nunha casa para comer. A comida dese día é especial. Os mellores doces e a mellor comida cocíñanse nesta festa.

Tanto en Marrocos como en Pakistán se colocan luces pequenas de todas as cores nos supermercados, nas rúas e nas casas. A xente compra roupa nova para estrear ese día.

Mahoma naceu na Meca no ano 570 ou 571. O pai de Mahoma morreu antes de nacer el, por iso a Mahoma o criou súa nai, ata que tiña uns 6 anos. Despois morreu súa nai e criouse con seu tío e seu avó, que morreu cando el tiña uns 8 anos. Mahoma morreu aos 63 anos.

Elixe un poema e regálao

2011-02-08T12:22:00.005+01:00

Todos os poemas recollidos aquí foron escritos en moi distintas épocas, aínda que todos eles expresan un mesmo sentimento universal e intemporal: o amor. Cando os lemos podemos compartir a emoción que sentiron os que os escribiron... e incluso esa máxica ilusión de ser os seus exclusivos destinatarios, cando non os seus propios autores.

A selección foi feita por todos os profesores que estamos no equipo da biblioteca, esperamos que a escolma fose un acerto e que vos gusten.

A partir do xoves estarán impresos en papel no punto de lectura. Escollede os que vos gusten e introducídeos nun sobre co nome e curso das persoas a quen queredes agasallar, logo deixade o sobre no buzón. Desde a biblioteca faremos que cheguen aos seus destinatarios a partir do día 14 de febreiro.

II Certame de Narrativa Xuvenil "Entre Iguais"

2011-02-03T15:01:00.003+01:00

O Concello de Lugo convoca o II Certame de Narrativa Xuvenil "Entre Iguais". Poden participar rapazas e rapaces con idades entre os 12 e os 18 anos, sendo o prazo de presentación de traballos ata o 28 de febreiro de 2011. Se estás interesado en participar, podes consultar o texto completo das bases do certame.

Desexos de paz

2011-01-30T11:25:00.003+01:00

Se non estamos en paz con nós mesmos, non podemos guiar a outros na procura da paz.

Confucio (551 AC-478 AC). Filósofo chinés.

Exposición "Unha mirada matemática"

2011-01-29T13:17:00.001+01:00

Esta semana e a vindeira está instalada no corredor de entrada do instituto a exposición fotogrática "Unha mirada matemática" con fotos da profesora Nieves Díaz Fernández. A autora móstranos "como a natureza, arquitectura e obxectos cotidiáns, están impregnados de caprichosas formas xeométricas que lles confiren unha indiscutible e particular beleza. Nada escapa a esa mirada matemática".

A exposición chega a nós por xentileza do IES Porta da Auga de Ribadeo. Moitas grazas por compartila con todos nós.

30 de xaneiro, "Día da non violencia e da paz"

2011-01-26T10:00:00.001+01:00

Este ano para celebrar o "Día da non violencia e da paz" propoñemos a todos os membros da comunidade escolar a construción dun mural con citas referentes á paz. Non tedes máis que pinchar nas imaxes deste post e escribir a cita que vos guste máis para logo pegala no mural que está posto na entrada do instituto.
Moitas grazas a todos pola vosa participación.

TORNEO DEPORTIVO DO I.E.S. XOÁN MONTES

2011-01-22T10:43:00.012+01:00

Bases Torneo

ANIMÁDEVOS A PARTICIPAR!
PARA OBTER A FICHA DE INSCRIPCIÓN FALAR CON MARTA SALGADO (1º DE BACHARELATO)

O MEU ESPECIAL AGRADECEMENTO PARA Mª INMACULADA RODRÍGUEZ GARCÍA E COVADONGA GARCÍA-LOSA RODRÍGUEZ.

E no cotián... a poesía: Juan Antonio González Iglesias

2011-01-18T00:01:00.011+01:00

A obra poética deste profesor salmantino foi recentemente publicada nun só volume que leva por título Del lado del amor: poesía reunida (1994-2009). Segundo comenta o autor no epílogo: "Hay personas que centran su vida en 'todo lo que no es amor', según la fórmula muy clara con que los definió Marguerite Yourcenar. Ahí caben el dinero, el éxito profesional, el poder, me temo que también el sexo, y hasta la relación de pareja entendida como triunfo propio." En oposición a estas persoas están algúns poetas, entre os que se conta o autor, para quen linguaxe e amor son a mesma cousa.

Esto es mi cuerpo. Aquí

coinciden el lenguaje y el amor.

La suma de las líneas

que he escrito ha dibujado

no mi rostro sino algo más humilde:

mi cuerpo. Esto que tocas es mi cuerpo.

Otro lo dijo

mejor. Esto que tocas

no es un libro, es un hombre.

Yo añado que esto que te toca ahora

es un hombre.

Soy yo, porque no hay

ni una sola sílaba que esté libre de amor,

no hay ni una sola sílaba

que no sea un centímetro

cuadrado de mi piel.

En el poema soy acariciable

no menos que en la noche, cuando tiendo

mi sueño paralelo al sueño que amo.

No mosaico, ni número, ni suma.

No sólo eso.

Esto es una entrega. Soy pequeño

y grande entre tus manos.

Ésta es mi salvación. Éste soy yo.

Este rumor del mundo es el amor.

Ciclo de cine "Nos vieiros da mente"

2011-01-17T22:36:00.001+01:00

vieroslugo[1]

2011, Ano Internacional da Química

2011-01-16T22:31:00.003+01:00

A Organización das Nacións Unidas (ONU) declarou o ano 2011 como o Ano Internacional da Química. Na súa declaración indica que deste campo da ciencia se espera que proveñan novas solucións para o benestar da humanidade, principalmente as relacionadas coas fontes alternativas de enerxía, saúde e alimentación.

O ano da Química coincide co centenario do Premio Nobel de Química outorgado a Marie Curie. Esta extraordinaria científica, nada en Polonia e nacionalizada francesa, foi a pioneira na radioactividade, e tamén foi a única muller que recibiu o Nobel de Física (1903) e de Química (1911).

VIII Concurso Mellor Xornalista Infantil e Xuvenil 2010-2011

2011-01-14T00:08:00.004+01:00

Este concurso busca que os alumnos se familiaricen coa lectura e o manexo do xornal e desenvolvan a súa capacidade de exposición e redacción, baseándose en informacións publicadas na edición impresa ou dixital de La Voz de Galicia (Mellor Xornalista Infantil) ou mediante traballos orixinais de elaboración propia (Mellor Xornalista Xuvenil). É dicir, que cada un desde o seu nivel educativo concreto e desde a súa específica condición individual pode presentar o seu mellor traballo. O proceso de creación do mesmo pode aparecer reflectido a través do curso no blog de aula.

Na categoría xuvenil podes gañar un iPad, un MP5 de 8 GB ou unha cámara dixital!
Mira as bases do concurso e anímate a participar!

Bases VIII Concurso Mejor Periodista Infantil y Juvenil 2011

Comenzamos co 2º libro en "Estantigas 1 e 2"

2011-01-13T09:59:00.008+01:00

O venres 14 de xaneiro, á hora do recreo, vémonos como de costume na biblioteca ou na aula 19 para repartir os libros e organizar as lecturas. Non faltedes!

As próximas reunións serán o 28 de xaneiro e o 11 de febreiro.

2011, Ano Internacional dos Bosques

2011-01-11T23:06:00.001+01:00

2011 foi declarado Ano Internacional dos Bosques pola Asemblea Xeral das Nacións Unidas (ONU) ao recoñecer que estes ecosistemas e a súa ordenación sostible contribúen significativamente ao desenvolvemento, á erradicación da pobreza e ao logro dos obxectivos de desenvolvemento do Milenio.

Nun mundo ocupado por sete mil millóns de persoas, os bosques, que representan máis do 30 por cento do territorio e conteñen o 80 por cento da biodiversidade do planeta, perden anualmente trece millóns de hectáreas, unha superficie equivalente á cuarta parte da península ibérica.

As causas que sinalan os expertos son todas provocadas polos seres humanos: sobreexplotación e talla ilegal, a conversión a terras agrícolas e gandeiras, recolección insostible de madeira, xestión inadecuada da terra, creación de asentamentos humanos, explotacións mineiras e petrolíferas ou a construción de encoros e estradas, entre outras.

Por iso, o lema elixido para a campaña é "Os bosques, para as persoas", co obxectivo de resaltar o papel fundamental dos seres humanos na protección dos bosques, fogar de 300 millóns de persoas no mundo, especialmente pobos indíxenas que están tamén ameazados.

Podemos contribuír a recuperar a masa de bosques do planeta de diversos xeitos. A máis activa é plantar unha árbore coas nosas propias mans. Outra opción é axudar ás asociacións ecoloxistas ou que traballan coas árbores e presionar ás institucións para que emprendan medidas que defendan os bosques, como a creación de espazos protexidos e corredores entre estas áreas, o apoio a prácticas eficientes e a unha xestión forestal sostible ou a repoboación con especies autóctonas das zonas deforestadas.

E podemos asumir hábitos de consumo que eviten a utilización insostible dos bosques aplicando as tres erres (reducir, reutilizar e reciclar) nos produtos procedentes da madeira e outros involucrados na deforestación, como os combustibles ou os produtos agrogandeiros. Tamén é posible consumir produtos con etiquetas ecolóxicas (no caso da madeira, o selo FSC) ou realizar actividades de ecoturismo.
Porque... os bosques son para as persoas!

Centenario de Carvalho Calero e Miguel Hernández: publicación da exposición

2011-01-11T00:07:00.022+01:00

Unha vez rematada a exposición que conmemoraba o centenario do nacemento de Ricardo Carvalho Calero e Miguel Hernández Giner, o equipo da biblioteca do IES Xoán Montes quere ofrecela a calquer outro centro educativo ou institución que a considere de interese. A cada autor dedícanselle 12 láminas de 50x40 cm e un boletín de exercicios e curiosidades relativo aos paneis. O contido podedes comprobalo neste mesmo blog, no menú lateral BOLETÍNS DE CONCURSOS E CONMEMORACIÓNS. O aspecto das láminas pódese ver no resume fotográfico que publicamos recentemente. Para calquera consulta ou suxestión podedes poñervos en contacto con nós no noso correo electrónico bibliotecaxoanmontes@gmail.com
As láminas están publicadas con licenza Creative Commons:

Centenario de Miguel Hernández by O Sorriso da Muralla is licensed under a Creative Commons Recoñecemento-NonComercial-CompartirIgual 3.0 Unported License.

Centenario de Carvalho Calero by O Sorriso da Muralla is licensed under a Creative Commons Recoñecemento-NonComercial-CompartirIgual 3.0 Unported License.

O último día do ano tamén se corre!

2010-12-30T21:11:00.003+01:00

Despois de pasar todo un ano correndo e competindo, chega o último día do ano. Último día, no que se supón, que a maioría da xente se atopa en compaña da súa familia. Pero sempre hai algúns tolos que dedican o último día do ano a entrenar ou a competir no mundo do atletismo.

O día 31 de decembro é San Silvestre, por iso a maioría das competicións que se celebran ese día levan o nome de "San Silvestre". Unha das máis famosas do mundo é a San Silvestre Vallecana (celebrada en Madrid, cunha distancia total de 10 km). Pero en Galicia non nos quedamos atrás, e tamén podemos presumir de organizar algunhas San Silvestre, como por exemplo, as celebradas en A Coruña ou en Lugo.

En Lugo celébrase a 16ª Carreira Popular San Silvestre Club Fluvial, que terá lugar o venres día 31 de Decembro, organizada pola sección de atletismo do Club Fluvial. A saída da carreira terá lugar no Paseo Fluvial, preto do Pazo de Feiras e Exposicións ás 16:30.

Para os interesados, haberá trofeos para os tres primeiros clasificados de cada unha das categorías. Os corredores participantes no circuito das Carreiras Populares Larsa Corre con Nós 2010-2011 xa estarán inscritos para participar nesta proba e deberán levar o dorsal e o chip co que participan no circuito.

QUE MELLOR OPCIÓN QUE ACABAR O ANO CORRENDO?

NADAL 2010

2010-12-22T13:00:00.000+01:00

BO NADAL A TOD@S

Moitas grazas a tod@s polo traballo e pola decoración.

"MATEMÁTICAS HOXE"

2010-12-21T23:20:00.001+01:00

O profesor D. Juan Manuel Viaño Rey, catedrático de Matemática Aplicada na U.S.C., impartiu hoxe unha conferencia no noso centro á que asistiron os alumnos de 4º de E.S.O. e bacharelato. Nela aprendemos as moitas utilidades dos coñecementos matemáticos e as súas aplicacións en aspectos moi descoñecidos para a maioría da xente, como pode ser a resolución de problemas de medio ambiente, deseño de procesos industriais, predicións meteorolóxicas, formulación de modelos económicos e enterámonos que incluso os implantes dentais teñen que ver coas matemáticas.

Tamén resaltou o pouco visibles que son na nosa sociedade os matemáticos e os científicos en xeral, comparando a súa popularidade con personalidades destacadas do mundo da literatura, arte e deporte.

Foi unha conferencia amena, instructiva e sorprendente no seu contido para a maioría dos que estabamos alí.

Queremos manifestar o noso agradecemento, en particular da Vicedirección do centro e do Departamento de matemáticas, ao profesor Viaño pola súa deferencia ao vir ao noso instituto de xeito totalmente desinteresado.

PROGRAMA DO FESTIVAL DE NADAL 2010... o día 22 de decembro a partir das 9:30 h.

2010-12-21T08:23:00.002+01:00

Presentado por Alba Mª Pereira e Christian Toimil.
-DANZA RIBADAVIA interpretada por Xosé Lois Chorén (gaita).

-ZÚMBALE, ZÚMBALE AL PANDERO interpretado por Cuarteto de vento máis percusión (Saxofón: Yolanda Sal, Fagot: María Losada, Trompeta: Laura Seijas, Trompa: Marta Salgado e Percusión: Yeray Pita).

-CAMPANITA DE LUGAR interpretado pol@s alumn@s de 2º da ESO (vocal e instrumental).

-NAVIDAD, NAVIDAD interpretado pol@s alumn@s de 3º da ESO (vocal e instrumental).

-TITANIC interpretada por María Pereira Blanco (piano).

-BENEDICAT VOBIS interpretada pol@s alumn@s de 4º da ESO e de 1º de BAC (vocal e instrumental).

-O BO REI WENCESLAO interpretado pol@s alumn@s de 4º da ESO e de 1º de BAC (vocal e instrumental).

-HIJO DE LA LUNA interpretada pol@s alumn@s de 4º da ESO e de 1º de BAC (vocal e instrumental).

-EU NON SEI interpretada pol@s alumn@s de 3º e 4º da ESO.

-EU NAMORAR interpretada pol@s alumn@s de 3º e 4º da ESO.

-AY LINDA AMIGA interpretada pol@s alumn@s de 3º e 4º da ESO.

-CANCIÓN DE CUNA (BRAHMS) interpretada pol@s alumn@s de 3º e 4º da ESO.

-GATATUMBA interpretada pol@s alumn@s de 3º e 4º da ESO.

-ADESTE FIDELES interpretado pol@s alumn@s de 3º e 4º da ESO.

-NOCHE DE PAZ interpretado pol@s alumn@s de 3º e 4º da ESO.

-"CLUB-CAN HANDLE ME" baile feito pol@s alumn@s de 2º da ESO.
-JINGLE BELL ROCK interpretada pol@s alumn@s de 4º da ESO.
-JUSTIN BIEBER (BABY) baile feito polas alumnas de 1º da ESO.
-MONÓLOGO a cargo do alumno de 1º de BAC: Christian Toimil.
-SORTEO DE NADAL xentileza dos participantes na excursión de fin de curso de 4º da ESO. Levade un boli ou un lápis.

AGARDÁMOSVOS A TODOS!!

Tende unha man

2010-12-20T00:08:00.003+01:00

Convencida de que a promoción da cultura da solidariedade e o espírito de compartir era importante para a loita contra a pobreza, a Asemblea Xeral da ONU proclamou o 20 de decembro como Día Internacional da Solidariedade Humana. O tema de este ano 2010 é: «Tender unha man aos nosos veciños» para pór de relevo o feito de que a pesar dos indicios alentadores de progreso no logro dos obxectivos de desenvolvemento do Milenio, seguen existindo profundas disparidades, entre os países e dentro deles.

Queremos facernos eco dunha campaña que está levando a cabo Médicos Sen Fronteiras. Grazas á colaboración e esforzo de gran número de empresas, entidades e persoas, lograron obter a un prezo estraordinariamente axustado as "Pastillas contra a dor allea" . Véndense a só 1 euro (exclusivamente en farmacias) e comprando esta caixa de caramelos estás colaborando nunha campaña solidaria de axuda a enfermos esquecidos.
Os ingresos netos procedentes desta campaña destinaranse integramente a financiar proxectos de MSF sobre malaria, tuberculose, enfermidade do soño, kala tsar, SIDA pediátrica e Chagas.

Está é so unha das innumerables formas de colaborar tendendo unha man.
Máis información en MSF

Propostas para o Nadal

2010-12-18T21:42:00.005+01:00

O Museo Provincial de Lugo, o Museo Provincial do Mar, o Museo Etnográfico San Paio de Narla e o do Pazo de Tor queren celebrar as festas do Nadal 2010 cun programa que pretende satisfacer a todos os que desexen achegarse aos museos sexa cal sexa a súa idade: obradoiros moi variados para aprender e gozar, pensados para os máis novos; exposicións, algunhas curiosas, sorprendentes, con temáticas moi diferentes; intervencións na exposicións permanentes que propoñen novos puntos de vista para ver os museos, concertos con instrumentos nada correntes, visitas guiadas, a revista oral “O pazo das musas” , xornadas interesantes e outras suxestións que teñen o obxectivo de complementar a tradicional emotividade destas datas.

Seguro que atopas algunha actividade de interese, pincha AQUÍ e tamén AQUÍ para poder visualizar os programas.

Por outra banda, o Concello tamén presenta un programa con case medio centenar de actividades de lecer e ocio para o Nadal, desde exposicións ou musicais ata concertos ou representacións de teatro infantil, unha busca do tesouro con interesantes premios e a xa tradicional Feira de artesanía ArteNadal.
Non te quedes sen participar nalgunha das actividades, pincha AQUÍ para poder visualizar os programas.

Fotos da exposición do centenario de Carvalho Calero e Miguel Hernández

2010-12-17T20:37:00.004+01:00

Xa rematada a exposición, aquí tedes para o recordo unhas fotos do que foi. Moitas grazas aos que buscaron información, redactaron, corrixiron, ilustraron, fixeron os boletíns, compraron os cadriños buscando o mellor prezo e os colocaron. Vaia tamén o noso agradecemento para os que a visitaron, disfrutaron, explicaron, prestaron libros e material e, aos que amablemente se prestaron a ser fotografiados para poder poñer este post.

Marta Domínguez, a atleta que tiña namorado a un país

2010-12-11T21:15:00.000+01:00

Marta Domínguez foi detida o pasado xoves pola Garda Civil pola súa vinculación a unha rede de dopaxe. É a atleta da que probablemente menos se esperaba esta noticia. Atópamonos nunha situación na que o deporte é un dos máximos, por non decir o máximo expoñente no noso país, e non se poden permitir conductas deste tipo, xa que non soamente dañan ás persoas de élite que viven do deporte, senón que inflúen en persoas que adícanse ao deporte amateur.

Marta Domínguez (Palencia, 1975), a mellor atleta española de todos os tempos, é considerada o principal referente do atletismo na última década. A palentina, mellor atleta nacional en 5 ocasións e Premio Nacional do deporte en 2009, ten un dos curriculums deportivos máis laureados do atletismo español.

Os seus primeiros pasos nisto do mundo do atletismo, antes de ter os 10 anos, foron na escola municipal de Venta de Baños, onde actualmente celébrase unha das probas de campo a través máis importantes de España. Apaixoada do fútbol, Marta decantouse polo atletismo, o deporte que a cautivou, chegando a ser a capitana da selección española de atletismo e vicepresidenta da federación (RFEA). Marta foi 39 veces internacional, entre elas puido conseguir ser campeona na proba de 3.000 obstáculos nos anteriores Xogos Olímpicos.

Pero agora a súa carreira vese empañada, a atleta foi acusada pola distribución de substancias dopantes na denominada operación "galgo", da que finalmente saíu en liberdade con cargos.

Esta é unha das moitísmas noticias deste tipo que se levan dado no transcurso dos últimos anos no mundo do deporte, pero esperemos que ésta, a diferencia das outras, sexa a última. E non se supón que o deporte debe facerse UNICAMENTE POLO PURO PLACER DE FACELO?.